【2023東京必去景點】10大東京食買玩自由行好去處｜加碼盤點開關必去6個新景點（持續更新）

#自由鳥漫遊世界

日本終於開放免簽證自由行鳥！係咪已經準備好要返鄉下止旅行癮呢？作為一隻最鍾意去旅行嘅有腳雀仔，今次我就嚴選咗6個2020年起新開嘅熱門地方畀大家，加埋10個日本東京必去嘅景點，即刻去睇吓東京有咩食買玩嘅好去處！

 

2022東京必去開關新景點

1．東京豐洲teamLab Planets TOKYO
光加熱就等於火，咁光加聲呢？係等於靚呀！聲名大噪嘅藝術團隊teamLab今次嚟到豐洲！如果你鍾意極致嘅聲光沉浸體驗，就務必去參觀「teamLab Planets TOKYO 」藝術展。唔單止有聲有色，呢度仲有同「水」互動的7件體感型藝術作品。你可以全身感受，投奔藝術，同作品融為一體。去之前記得上網買定飛，喺指定預約時間入去呀！

 

 

【詳細資料】
景點地址：東京都江東区豊洲6-1-16
開放時間：09:00～23:00、星期五、六同假日前一日 09:00～24:00
景點票價：大人3,200日圓 / 學生2,000日圓 / 兒童1,000日圓（3歲以下免費）

交通方式：搭海鷗線到「新豐洲站」，再行1分鐘

 

2．西武園遊樂園
如果可以時光倒流62年，你會身處何方？不如就去位於埼玉縣所澤市嘅西武園遊樂園，穿越到日本1960年代嘅昭和時期，玩盡復古市景！西武園遊樂園喺2021年5月翻新，入面所有建築物、遊樂設施同美食都重現咗1960年代嘅古典小說優雅的情感。

 

 

年華悠悠，梗係唔會悶透。代入昭和時空，喺夕日之丘商店街打卡、食嘢、買手信，仲有表演可以睇，值得你駐足停留。值得一提嘅係，喺西武園遊樂園玩需要購買「西武園通貨」，即係樂園裡專用貨幣，令你更加投入呢個獨特嘅樂園樂趣！

 

 

西武園遊樂園仲設有戲院「夕陽館」，入面上映「哥斯拉 The Ride 大怪獸頂上決戰」。佢除咗係一套電影，仲係個有得體驗刺激嘅電影世界嘅大型遊樂設施。前所未有嘅真實影像，令你好似真係親歷其境一樣！

 

【詳細資料】
景點地址：埼玉縣所澤市山口2964
聯絡電話： +81 4-2929-5354
開放時間：平日：10:00～17:00 假日：10:00～19:00（依日期而異。記得事先到西武園遊樂園官網確認開放時間）
景點票價：大人4,400日圓 / 兒童3,300日圓（3歲以下免費）
交通方式：喺西武鐵道「西武園遊樂園站」落車就到

 

3．豪華露營度假村Grandome Chiba Futtsu
全關東最豪華嘅露營度假村Grandome Chiba Futtsu喺今年開幕喇！度假村入面有20棟建築，當中包括天然溫泉、私人游泳池、私人桑拿同星空帳幕等等。露營必須要咩？唔係酒呀，係BBQ呀！你仲可以喺度嘆到千葉縣嘅新鮮食材：和牛、鮑魚、鯛魚同貝類食材等，應有盡有！

 

 

【詳細資料】
景點地址：千葉縣富津市湊1660-3
聯絡電話： 050-3174-7253
交通方式：喺東京出發約60分鐘，由東京灣Aqua-Line喺「富津中央IC」出發約8分鐘。搭火車由JR東內房線「和佐港站」行12分鐘

 

4．東京迷你模型主題樂園SMALL WORLDS TOKYO
全球最大嘅迷你模型主題樂園喺2020年東京開幕！ SMALL WORLDS TOKYO佔地8,000平方米，園內有6個不同主題嘅模型展區，全部以1/80嘅比例製作，每十多分鐘就會替換日夜場景。6個展區包括：宇宙中心（睇到1960年代火箭發射升空）、世界之街（主題係1900年代工業革命期間亞洲和歐洲嘅五個國家）、美少女戰士專區、關西機場、EVA格納庫及第3新東京市區。

 

 

我雖然係一隻小小小小鳥，但你都可以做一個小人㗎！講嘅唔係做衰嘢嗰啲小人，係縮細版嘅你呀。如果你想，可以喺園內用3D掃描機，影低你全身，再整成兩個1/80嘅人仔模型。一個畀你帶返屋企留念，另一個就留喺度加入小人園，同月野兔做鄰居！

 

 

【詳細資料】
景點地址：東京都江東區有明1-3-33 Ariake Butsuryu Center
開放時間：平日：11:00～19:00 星期六、日：11:00～20:00
景點票價：大人2,700日圓 / 兒童1,000-1,900日圓（3歲以下免費）
交通方式：喺「JR新橋站」乘百合海鷗號，又名東京臨海新交通臨海線，到「有明網球之森站」步行3分鐘左右

 

5．讀賣樂園宇宙夢工廠園區SPACE factory
人氣主題樂園東京讀賣樂園喺2021年同大正製藥合作推出SPACE factory。樂園入面設有離心力強嘅過山車「力保健月亮太空船」、全程不停上上落落嘅「奮力一發」，同埋「力保健實驗室」工作坊，等你一過cosplay藥物研究員嘅癮，體驗製作汽水糖藥丸！

 

 

【詳細資料】

景點地址：東京都稲城市矢野口4015-1

開放時間：10:00～17:00 （開園時間可能有唔同，請事先到SPACE factory官網確認當日開放時間）

讀賣樂園票價：

入園費（僅為進入遊樂園）大人1,800日圓 / 兒童1,000日圓（3歲以下免費）

入園費（一日通票 入園＋遊樂設施無限搭乘）大人5,800日圓 / 兒童2,400日圓（3歲以下免費）

交通方式：喺京王電鐵線「新宿站」前往「調布站」，轉乘往「橋本」方向路線，抵達「京王讀賣樂園站」；再搭乘附近嘅空中纜車前往樂園，過程約5至10分鐘

 

6．深谷花園PREMIUM OUTLETS
去日本梗係唔少得行Outlet掃貨！想放膽消費、無節制？啱哂啦，而家Yen又大跌，大手買嘢都唔肉赤～咁啱東京近日嘅深谷花園PREMIUM OUTLETS開幕，係全新嘅行街購物熱點！入面有將近140間店舖進駐，包括Marc Jacobs、Levi’s、Champion、Furla、Samantha Thavasa、Adidas、Nike、Francfranc、Sanrio同The Cosmetics Company Store等。

 

 

行到攰，就去搵熱門美食醫下肚～推薦你試吓超人氣長龍店「長瀞とガレ」嘅燒蕃薯軟雪糕，食過你就返唔到轉頭！順便試埋Moisaitama Maruhiro嘅蜂巢雪糕，補補血又再血拼過！

 

 

【詳細資料】
景點地址：369-1244 埼玉県深谷市黒田169
聯絡電話： +81 48-584-8700
開放時間：（商店）10:00～20:00；（食肆）11:00～21:00；（cafe）9:30～20:00
交通方式：
(1)電車：
喺新宿站坐湘南新宿線往高崎方向嘅特別快速列車，喺熊谷轉乘秩父鐵道至「深谷花園站」，步行3分鐘到達，全程需時1小時40分
(2) 巴士專線：
– 喺JR高崎線「深谷站」坐專線巴士至總站，需時25分鐘（只限周末及假期）
– 喺東武東上線「森林公園站」坐專線巴士至總站，需時45分鐘（每日有車）

 

2022東京必去景點｜打靚卡景點

1．淺草＋雷門＋仲見世通

淺草曾經喺江户時代，係東京最繁華熱鬧嘅街道。如果你想體會古色古香嘅江戶風情，就絕對唔可以錯過呢座東京最古老嘅寺廟──淺草寺。

進入淺草寺之前，先喺巍峨嘅雷門欣賞呢個咁醒神嘅紅色大燈籠。雷門嘅左右兩邊分別有風神同雷神鎮守，咁就解釋咗點解雷門完整嘅朵係叫「風雷神門」。

 

 

穿過雷門，就會嚟到淺草最熱鬧嘅街道——仲見世通。呢條商店街嘅兩邊都聚集咗好多人氣攤檔，攘來熙往，無論係想食淺草出名喺人形燒同和菓子；定係想買江戶風嘅玩具、手信同民藝品，通通都可以喺度搵到。有得食、有得行、仲有得買，唔怪之得去得東京就一定要嚟淺草玩！

 

 

行完仲見世通商店街，終於到達歷史悠久嘅淺草寺。淺草寺創建於公元628年，寺內供奉嘅係觀世音菩薩，所以本堂正殿又稱為觀音堂。唔講你可能唔知，淺草寺經歷過多次火災、地震同戰爭摧殘，更喺第二次世界大戰期間被炸毀，係一座飽經風霜嘅寺廟。好彩，淺草寺得到日本全國民眾嘅捐贈而重建，於1960年涅槃重生，成為和平嘅象徵。

 

 

幾個世紀以嚟，到淺草寺觀光嘅遊客絡繹不絕，仲有好多妹豬鍾意著和服嚟寺廟參拜上香添！當你入去見到煙霧繚繞，唔好搞錯呀！呢啲並唔係啲妹豬嘅仙氣，其實係香爐嘅聖煙嚟㗎。傳說將大香爐嘅煙霧攬上身可以保持身體健康，沐浴其中可以治癒傷口。心傷醫唔醫到就唔知喇，但一場嚟到，唔試下又點對得住自己？

 

 

【詳細資料】

景點地址：東京都台東區淺草2-3-1

聯絡電話：03-3842-0181

開放時間：自由參觀

交通方式：坐地鐵銀座線到「淺草站」，步行3分鐘／坐都營地鐵淺草線「淺草站」，步行5分鐘

 

2．上野恩賜公園

上野恩賜公園（簡稱上野公園）並唔係普通嘅郊野公園，佢巴閉到喺1873年，榮獲指定為日本第一座公園。雖然佢以春天爛漫嘅櫻花景色聞名海外，但其實不論係春夏秋冬邊個季節，佢都一樣索爆鏡，有令人陶醉嘅旖旎風光。

由江戶時代開始，上野公園就已經係首屈一指嘅賞櫻勝地。直到而家，喺每年春天櫻花盛開嘅時候，你都可以喺上野公園欣賞到1200棵櫻花樹盛開嘅美景。中央園內嘅櫻花大道綿延400公尺，春色宜人，櫻花綻放，漫步其中，你一定會樂而忘返。

 

 

到咗夏天，就輪到繡球花同荷花璀璨綻放。由五月到八月初，你都可以喺上野公園欣賞到繁花似錦嘅絕美風景。

 

 

秋風起，楓葉丹紅。喺秋天到訪上野公園就要觀賞銀杏同紅葉喇～全園美不勝收。喺11月尾至12月初嚟上野公園，係感受秋天的童話嘅最佳時機。

 

 

如果係冬天嚟上野公園，就可以一飽代表吉祥富貴嘅牡丹花怒放嘅美景，仲有蠟梅同梅花乍放，令人嘖嘖稱奇。

 

 

【詳細資料】

景點地址：Uenokoen, 台東區東京都 110-0007日本

聯絡電話：+81 3-3828-5644

開放時間：05:00～23:00

交通方式：搭電車到「上野站」，公園口出站，步行5分鐘

 

3．明治神宮

如果去東京只能夠揀一個神社遊覽，咁一定非明治神宮莫屬鳥。呢個神社貴為日本人嘅都市心靈綠洲，當然有佢嘅過人之處。地理位置上，明治神宮係鎮守東京嘅神社，旨在紀念明治天皇同昭憲皇太后。呢度有佔地70萬平方公尺嘅廣闊森林，生態系統豐富，被視為有再生能量㗎！

 

 

喺原宿站行出嚟，越過蜿蜒嘅幽深林間，就會見到佔地廣大嘅明治神宮。穿過鳥居，徐行兩排蒼天大樹之間，人世間最寫意嘅moment莫過於此。除咗去明治神宮本殿，你必定要去明治寶物殿、源場同2019年開幕嘅明治神宮博物館朝聖。放慢腳步，喺明治神宮享受原宿鬧區中呢處鳥語花香嘅異世界。

 

 

【詳細資料】

景點地址：東京都涉谷區代代木神園町1-1

聯絡電話：+81 3-3379-5511

開放時間：10:00～16:30 ;（定休日：每週四）

交通方式：明治神宮有三個入口，分別係南口、北口同西口，而三個入口都有各有距離較近嘅地鐵站

• 北口：「代代木站」。搭乘JR山手線至「代々木」，喺西出口步行5分鐘。
• 西口：「參宮橋站」。搭乘小田急線至「参宮橋」，喺出口步行5分鐘。
• 南口：「原宿站」、「明治神宮前站」。搭乘JR山手線至「原宿」，喺2號出口過馬路即可抵達南口；搭乘東京地鐵千代田線、副都心線至「明治神宮前」，喺5號出口步行5分鐘。

 

2022東京必去景點｜勁好玩景點

歌舞伎町

歌舞伎町係日本少數大型紅燈區。貴為不夜城，到咗夜晚，歌舞伎町仍然係燈火通明、車水馬龍，愈夜愈精彩！ 呢度最多嘅係牛郎店、餐廳、藥妝店同卡啦OK，係大部分人收工之後鬆一鬆嘅地方。想感受多姿多彩嘅東京夜生活，就一定要嚟歌舞伎町威！

 

 

【詳細資料】

景點地址：東京都新宿區歌舞伎町

交通方式：搭JR山手線到「新宿站」，喺東口步行約10 分鐘

 

2022東京必去景點｜喪濕平景點

阿美橫丁

阿美橫丁商店街位於東京上野車站與御徒町車站之間，每日都會大約有10萬人嚟行街。如果想瘋狂買嘢，可以喺下午時間嚟呢個庶民購物天堂。阿美橫丁熱鬧非凡，你想買嘅都喺齊晒呢條商店街。無論係日式零食、街頭小食、平價藥妝、公仔扭蛋定係新鮮生果，阿美橫丁通通都有。嚟東京記得唔好走寶！

 

 

【詳細資料】

景點地址：台東区上野公園池之端3

交通方式：搭JR山手線／東京Metro地鐵銀座線／日比谷線，喺「上野站」出

 

2022東京必去景點｜玩到癲景點

1．東京迪士尼樂園

去東京點可以唔去東京迪士尼玩？就算唔係迪士尼嘅狂熱粉絲，你都可以喺樂園暢享難忘時光。迪士尼分為「東京迪士尼度假區」、「東京迪士尼海洋」兩個園區。疫情期間，樂園新增咗嶄新夢幻概念區：係以《美女與野獸》為主題嘅「夢幻樂園New Fantasyland」；而「明日世界（Tomorrow Land）」內亦都新增咗以大英雄聯盟（Baymax）為主題嘅機動遊戲區域！穿梭東京迪士尼樂園，投入童話世界！

 

 

【詳細資料】

景點地址：千葉県浦安市舞浜1-1

聯絡電話：0570-00-8632

開放時間：08:00～22:00（每日開園時間都唔同，記得事先到東京迪士尼官網確認當日開放時間）

交通方式：搭JR京葉線，喺「舞濱站」出

 

同場加映－全新《反斗奇兵》（Toy Story）主題酒店

東京迪士尼嘅《反斗奇兵》（Toy Story）主題酒店已經喺2022年正式開幕，成為東京迪士尼度假區入面嘅第五間酒店。酒店外圍七彩繽紛，你邊行會邊360度被玩具包圍──門口廣場有胡迪、巴斯光年、牧羊女等角色雕像企定定歡迎你；大廳以拼圖圖案嘅地板佈置；客房係以安迪房間為主題，有經典藍天白雲牆壁、米奇手錶形狀嘅時鐘同星型燈等等，係《反斗奇兵》嘅粉絲一定會認得出！

 

 

2．三鷹之森吉卜力美術館

你睇過幾多套日本動畫大師宮崎駿嘅作品呢？你又知唔知原來三鷹之森吉卜力美術館係由佢親自設計呢？吉卜力出品咗眾多家喻戶曉嘅動畫電影，被喻為「日本版嘅迪士尼公司」。如果你都鍾意《龍貓》、《魔法公主》、《千與千尋》等電影，就絕對唔可以錯過呢個人氣朝聖地！三鷹之森吉卜力美術館位於「井之頭恩賜公園」嘅西園入面，入口處就有隻巨型龍貓站喺售票亭等住同你自拍！

 

 

雖然一票難求，但嚟到美術館入面，見到周圍都充斥住吉卜力嘅動畫元素，你就會知道張飛幾難買都係值得。館內除咗展示吉卜力工作室作品資料，仲有動畫造景、模型可以睇，加埋互動式嘅示範道具可以親手操作。入三鷹之森吉卜力美術館，盡情體驗動畫世界嘅古靈精怪魅力。

 

 

【詳細資料】

景點地址：東京都三鷹市下連雀1-1-83

聯絡電話：0570-055777

景點票價：大人1,000日圓 / 兒童100-700日圓（4歲以下免費）

開放時間： 10:00～18:00（但可入場嘅時間只有4個時段：10:00、12:00、14:00、16:00）

交通方式： 喺JR「三鷹站」南口9號搭乘黃色接駁巴士（自費），落車步行1分鐘

 

2022東京必去景點｜食好西景點

築地市場

去東京搵好西食，點會唔去世界知名度首屈一指嘅築地市場呢？佢分為「場內市場」和「場外市場」。場內市場主要負責魚類競標同拍賣，而呢部分已經喺2018年搬到豐洲市場。不過唔緊要，其實場外市場有更多選擇，保留咗眾多傳統市集名店：各玉子燒、海鮮、壽司、丼飯、刺身⋯⋯係咪睇字都已經忍唔住口水分泌？

 

 

 

【詳細資料】

景點地址：中央区築地４-16-2

開放時間： 06:00～15:00

交通方式：搭都營地下鐵大江戶線「築地市場站」線／淺草線「東銀座站」出

 

2022東京必去景點｜遊近郊景點

1．輕井澤

除咗市區，東京近郊都有好多值得一去嘅地方。輕井澤可以稱得上係人間仙境，佢日本係長野縣東部北佐久郡嘅一個小城鎮。輕井澤夏季清涼、冬天寒冷，係以避暑山莊、滑雪勝地而聞名。

 

 

呢度有沿溪流而建嘅歐陸風情小木屋、涓涓細流嘅白絲瀑布、由石頭同玻璃相互融合堆砌而成嘅石之教堂，仲有超級無敵勁好景嘅王子飯店別墅，如果冬天嚟滑雪就一流！除此之外，係想血拼嘅話，仲有輕井澤Outlet俾你行，非常適合留喺度玩足兩日一夜。

 

 

【詳細資料】

景點地址：〒389-0102 長野県北佐久郡軽井沢町大字軽井沢541

交通方式：從JR「輕井澤站」徒步20分鐘

 

2．富士山河口湖

講到東京，又點可以唔提富士山？去邊度可以睇得佢最清楚？首選就一定係去河口湖！河口湖位於山梨縣富士河口湖町，係屬於富士五湖之一。萬里無雲嘅時候，富士山同佢湖中嘅攣生倒影相映成趣，令人嘆為觀止。河口湖周邊仲有唔少美術館同公園可以遊賞，包括天上山公園、大石公園、紅葉迴廊、新倉山淺間公園同忍野八海等等。順便你仲可以去埋離河口湖不到五分鐘車程嘅富士急樂園放電添！

 

 

【詳細資料】

景點地址：日本山梨縣南都留郡富士河口湖町

交通方式：搭到「大月站」轉乘富士急行線，到「河口湖站」，再行約20分鐘

 

相片來源來自網絡。