2023自由鳥Fans票選 【日本世一X街中伏旅遊景點】

有咩慘過忍左幾年冇得去旅行？就係忍左幾年冇得去，一有得去，就去左仆X中伏旅遊景點！

本鳥都仆過唔少，所以特登為大家整理左自由鳥Fans票選【日本世一X街中伏旅遊景點】，俾大家參考下。

 

日本X街中伏景點【第5位】︰

別府地獄溫泉、大阪金龍拉面、自由之丘、北野異人館 (並列)

 

別府地獄溫泉  –  溝稀左的顏色水

九州別府地獄溫泉係著名觀光景點，擁八大地獄溫泉。其中最出名嘅係「血之池地獄」，以其血紅色泉水及含氧化鐵和氧化鎂嘅紅色熱泥而聞名。

但部份網友去完就覺得「好像溝稀左嘅顏色水」、「淺色野菜汁溫泉」、「又5靚，完全無驚喜！」

大阪金龍拉麵  – 「豬臭味」拉麵

超人氣大阪金龍拉麵被稱為日本必食拉麵之一，位於大阪道頓堀、心齋橋地帶，價錢適中，地點便利。

網民卻評價「味道一般，其實有好多拉麵都比佢好食」、有人甚至話「途經金龍拉麵時都覺得裡面傳來一陣「豬臭味」，令人毫無食欲！」。

自由之丘 – 吹大咗嘅「東方威尼斯」 

有「東京小歐洲」、「購物天堂」、「甜點天堂」等美譽嘅東京逛街必去景點「自由之丘」，以歐陸風格嘅建築及街道見稱，有不少雜貨、甜點美食的商店，深受年輕人歡迎。

但有網民就覺得「只不過係好普通嘅食甜品地方」、「所謂的小威尼斯只是一個水池」，甚至乎「去澳門威尼斯人度假村酒店或許更好」。

北野異人館 – 每一間異人館都要課金

北野異人館係神戶熱門觀光地之一，有不同的特色建築同異國美食。

但網民就大呻「入場費好貴，又無咩特別，橫濱都有異人館，仲要唔洗錢。」、「景點比較沉悶，欠缺洋和融和的文化特色」。

 

其他旅行攻略

【2023東京必去景點】10大東京食買玩自由行好去處｜加碼盤點開關必去6個新景點（持續更新）

【2023最強東京迪士尼攻略】：事先準備/快證 Fast Pass/買飛教學/交通/必玩設施推薦

【2023曼谷必遊IG-able景點合集】：隱世湖畔森林打卡cafe｜人氣市集最新資訊｜奢華極嘆SPA推薦

 

 

日本X街中伏景點【第4位】︰

北海道小樽運河、東京台場、大阪通天閣(並列)

 

北海道小樽運河 – 沒有雪的「元朗坑渠」

小樽運河是日本北海道小樽市的一處著名地標，北海道名列前茅的觀光景點。

不過網民就覺得小樽運河「無旅遊書介紹咁吸引」、「同城門河無分別」、「沒有雪的小樽運河，就跟元朗的坑渠沒太大分別 」。

 

東京台場 – 唔知睇左啲咩

東京台場係一個集海景、大型商城同娛樂設施嘅巨大人工島。

但好多網民就話台場係「百冇」，「冇野睇」、「冇野玩」、「冇特色」、「行下行下都唔知睇咩」。

 

大阪通天閣 – 去到只會講一聲 “吓”

大阪地標「通天閣」的頂樓可以俯瞰整個大阪，十分壯觀。

但網民就呻「辛辛苦苦行上去其實都冇乜嘢睇」、「通天閣超矮」、「去到只會講一聲 “吓”」。

 

 

日本X街中伏景點【第3位】

東京鐵塔 – 真心冇乜特別

位處東京中心，從展望台可以俯瞰整個東京都嘅「東京鐵塔」咁出名，點解會係X街中伏景點第3位呢？

原來網民話佢「地唔就腳又無靚景睇」、「真心冇乜特別」。本鳥再細心分析，東京鐵塔外觀設計係靚，值得遠眺影相，但自從更高更新嘅「東京晴空塔」落成後，特登上「東京鐵塔」嘅意義同吸引力就真心大減左好多啦。

 

日本X街中伏景點【第2位】

忍野八海 – 去完覺得，原來香港是最好的！

能夠上到第二位日本X街中伏景點，相信「忍野八海」應該唔少野！

「忍野八海是位於河口湖東南側和山中湖之間的熱門風景區，名稱取自富士山融化的雪水在忍野村湧出而形成的八座池塘。由於雪水在地底流動並天然過濾數十年後才湧出，因此極為清澈。」

以上係本鳥上網搵到嘅描述。

以下就係網民嘅咒罵，相信大家真係仆到直一直︰

「網上照騙，湖水好污糟，感覺係無人打理既屋村水池咁」、「世界遺產個名以為好勁啦，頂佢去到八個勁細既魚池仔，最大獲係我去完最大既記憶點係入面小食鋪既炸墨魚餅」、「一潭死水」、「太多遊客過於人工化」

 

 

日本X街中伏景點【第1位】

黑門巿場 – 遊客劏場

票數大幅拋離第二、三位幾倍，成功成為自由鳥Fans心目中最愛嘅相反，最X街嘅日本中伏景點【第1位】！「黑門巿場」的確當之無槐！我地一齊欣賞下網民嘅憤怒原因啦。

「選擇少，唔新鮮」、「價錢貴，專劏遊客」、「好多店已經變左中國人開」、「以為去咗女人街」、「多黑店！」、「當地人好少會去，又貴又唔係新鮮」、「去當地人的巿場好過」……不能盡錄。

愛嘅反面就係恨，能夠刻係網民心中深處，都唔係一件易事。如果大家有機會路過「黑門巿場」，都值得去朝聖下。

部分相片來源來自網絡。

 

其他旅行攻略

【2023東京必去景點】10大東京食買玩自由行好去處｜加碼盤點開關必去6個新景點（持續更新）

【2023最強東京迪士尼攻略】：事先準備/快證 Fast Pass/買飛教學/交通/必玩設施推薦

【2023曼谷必遊IG-able景點合集】：隱世湖畔森林打卡cafe｜人氣市集最新資訊｜奢華極嘆SPA推薦