【2023你可能不知道的東京世一旅行景點】：過千網民推薦 | 返鄉下必去10個人氣景點

#自由鳥漫遊世界

東京之旅唔會比一世遙遠！因為有我哋嘅送東京機票活動（最新回合喺度！）～喺第一彈嘅活動入面，過千網民熱議佢哋心目中嘅東京世一旅行景點。嚟緊計劃緊去東京旅行嘅你，不妨睇吓有冇去過呢啲地方，跟住我哋去玩均東京人氣景點！

 

沿途與你有過一幀風景 目黑川

位於中目黑嘅目黑川櫻花並木，係其中一個東京最人氣嘅賞櫻景點。如果你喺3月下旬至4月初嚟東京，千萬唔好錯過目黑川～因為呢段時間係目黑川嘅櫻花花期，開滿之後一個星期內就會凋謝。河岸兩側會有大約800株櫻花同時盛開，當風吹過，櫻花飄落，你就置身喺日本人稱之為「櫻花吹雪」嘅場地入面，係咪諗起都覺得浪漫呢？

 

 

目黑區除咗有摩斯漢堡店，其實仲有Blue Bottle、星巴克臻選®東京烘焙工坊、御飯糰咖啡廳Onigily Cafe、開心布丁屋MAHAKALA等等嘅Café同美食。嚟呢度散步，可以發掘到與別不同嘅東京魅力！

 

 

詳細資料
景點地址：東京都目黒區大橋～下目黒
聯絡電話：+81-3-5722-9621

 

網民點講？
@momo.camsy：我心目中嘅「世一東京景點」係位於中目黑嘅目黑川櫻花並木，係全東京最人氣嘅賞櫻景點
@momo.camsy：我心中的世一東京景點係目黑川，每年櫻花季節靚到不能之了，只要去過一次永世難忘

 

到東京近郊睇花海 茨城縣國營常陸海濱公園

想睇日本嘅花海美景嘅話，係咪第一時間會諗起北海道？其實喺東京近郊茨城縣，有個一年四季都適合去踏青嘅花田，唔同季節嚟都有唔同嘅絕景睇，一樣令人沉醉神往。

 

茨城縣國營常陸海濱公園就喺遼闊嘅太平洋沿岸邊。初春，呢度會開滿粉蝶花､水仙同鬱金香。唔講你可能唔知，常陸海濱公園粉蝶嘅花田係同南法嘅薰衣草田齊名，曾獲選為「世界十大浪漫花田」之一㗎！如果你係4月下旬至5月中旬嚟東京，就點都唔好錯過呢個如詩如畫嘅浪漫花田。

 

 

到咗仲夏，如果係7月上旬至7月中旬，你可以喺常陸海濱公園投奔盛開嘅薰衣草田；或者到8月中旬至8月下旬，一大片向日葵花海會喺朝陽入面綻開。

 

 

秋天該很好，因為原本綠油油一片嘅波波掃帚草，會喺夏秋交際嘅時候染紅，綻放最耀眼嘅色彩。如果想睇呢個掃帚草怒放嘅美景，就要趕喺10月上旬至10月中旬嚟睇喇！

 

 

冬天就冇花睇？唔會！雖然天氣凍會令比較少花種綻放，但其實油菜花田同樣會令你心生向往。漫步喺一大片金黃色嘅油菜花田中，畫面太美，你一定會盡全力謀殺菲林。有興趣嘅話，就記得1月上旬至3月中旬嚟公園鳥～

 

 

網民點講？

@Elina Cheung：東京近郊茨城縣國營常陸海濱公園定期有唔同嘅花海當年我都係用自由鳥去日本，就算郊區冇問題！只有自由鳥～世一東京景點，唯一選擇態度

 

詳細資料

景點地址：日本〒312-0012 Ibaraki, Hitachinaka, Mawatari, 字大沼605-4

聯絡電話：+81 29-265-9001

開放時間：09:30～16:30 （星期二休息）

 

灌籃高手名場景 鎌倉高校前電車站

講到日本動漫，「陽光」、「青春」同「大海」呢三個元素肯定一馬當先浮現喺你個腦入面。而鎌倉高校前電車站呢個平交道畫面，係每個灌籃高手迷都夢寐以求，一生要到訪一次嘅地方。

 

 

搭江之電由「七里ヶ浜」到「鎌倉高校前駅」之間，你都可以喺電車上面欣賞是連接神奈川縣嘅觀光景點，睇盡鐮倉同藤澤嘅沿海風光。東京人會經常喺夏天到呢帶嘅海岸線同湘南海岸，享受陽光與沙灘。同時，呢個海岸亦都係唔少日本廣告同日劇取景拍攝嘅勝地。就算你冇睇過灌籃高手，只要你有追開日劇，都應該覺得呢個復古電車喺海景入面嘅畫面熟口熟面。

 

 

可以點樣捕捉記憶中，晴子喺綠色電車駛過後，同櫻木花道喺海邊揮手嘅經典一幕？其實「鎌倉高校前駅」正正喺江之電路線嘅中間，喺鎌倉駅或者藤澤駅過嚟，都只需15 分鐘左右嘅車程。落車之後徒步前行1到2分鐘就到㗎喇～喺呢條一望無際嘅海岸線飽覽江之電駛過鐵道、眺望大海，可以治癒你一整日。海天一色嘅湘南海岸等你嚟解鎖～

 

網民點講？

@Geoff Leung：其實「世一東京景點」都係要睇同邊個去同有咩意義啫~️我既「世一東京景點」就係鎌倉高校前電車站！望住我女朋友既背影，大聲說我愛你！（明既就會明）希望下一次可以係同一個地點大聲說嫁俾我

 

詳細資料

景點地址：1-chōme-1 Koshigoe, Kamakura, Kanagawa 248-0033

 

貓 全部都係招財貓～貓奴必到豪德寺

好迫呀！因為呢座位於東京都世田谷區嘅豪德寺，入面全部都係招財貓呀！貓貓就一向可愛而且很有用喇，因為呢啲招財貓除咗得得意意，仲可以招嚟福氣，係最具代表意義嘅日本吉祥物之一。

 

 

相傳當年某日，修葺呢座廟嘅井伊直孝喺獵鷹嘅回程，路過豪德寺，睇到寺廟和尚養嘅白貓向佢招手，所以佢臨時決定喺寺廟抖吓先返歸。點知一入去，突然風雲色變，改咗回程初衷嘅直孝就好好彩避過呢場傾盆雷雨。後來呢隻貓貓過生之後，和尚為咗紀念佢，就雕刻咗隻擺出招手手勢嘅貓咪雕像，而呢個就係招財貓嘅雛形。

 

而家嘅豪德寺已經塞滿晒貓貓，原因係好多信眾都會嚟呢度許願同買招財貓返去，當願望真係實現咗，信眾會帶隻招財貓返去。物換星移，隨住香火興盛，豪德寺嘅招財貓愈嚟愈多，數量已經多達千隻喇！唔知有密集恐懼症嘅朋友會唔會覺得好恐怖～

 

值得一提嘅係，其實呢啲招財貓並冇手握金幣錢財，因為古人相信，招財貓招嚟嘅係「緣」，如果想將緣分同好運轉成財富，係靠人自身嘅努力。

 

網民點講？

@Jaffe Ho：我會選擇東京都世田谷區豪德寺, 因為豪德寺擁有數千隻招財貓排排企, 等著大家祈福, 探望一下招福貓, 是東京最萌最可愛的神社, 希望前去沾點福氣和財運, 可能會帶來好運。

 

詳細資料

景點地址：2 Chome-24-7 Gotokuji, Setagaya City, Tokyo 154-0021日本

聯絡電話：+81 3-3426-1437

開放時間：08:00～17:30

 

昭和人文氣息 神保町書店街

神保町位於東京神田川附近，呢度有全世界上最大嘅古書店街，集近200書店同110間古書店於一街。對於一般遊客嚟講，神保町書店街或者唔係好熱門嘅觀光地點，但係如果你想喺東京深度遊，就絕對推薦你嚟行吓呢條古色古香嘅書店街，感受濃郁嘅書卷氣息。如果去台灣一定會去嘅書店係誠品，咁嚟東京，一定要去嘅書街就係神保町。

 

 

神保町書店街可以話係日本嘅文化寶藏－佢係太平洋戰爭入面，唯一倖免於美軍空襲轟炸嘅地方。喺呢度，你會搵到林林總總嘅日本出版物，包括漫畫、雜誌、地圖、寫真集、建築書同浮世繪等等。每間書店嘅藏書主題都不盡相同，喺這片書海之中，埋頭於唔同嘅珍藏古本，一定俾到你難忘嘅東京體驗。

 

古書店界名門 一誠堂書店

鍾情於百年老店情懷？去創業超過100年嘅一誠堂書店，你會俾豐富嘅藏書包圍，涵蓋文學、歷史、宗教、電影同藝術範疇，仲有得買電影周邊商品，係真文青必訪之地。

 

 

詳細資料

景點地址：1 Chome-7 Kanda Jinbocho, Chiyoda City, Tokyo 101-0051日本

聯絡電話：+81 3-3292-0071

開放時間：10:00～18:30 （星期日休息）

 

電影發燒友朝聖點 矢口書店

矢口書店係另一間超過百年歷史嘅二手書店，入面收藏咗好多舊電影嘅稀有絕版海報、原著、導演嘅評論書籍同戲劇台詞本，以及連載孤本。如果你識日文，或者係電影發燒友，點可以唔嚟呢間書店尋寶？

 

 

詳細資料

景點地址：2 Chome-5-1 Kanda Jinbocho, Chiyoda City, Tokyo 101-0051日本

聯絡電話：+81 3-3261-5708

開放時間：星期一至六10:30～18:30 ；星期日11:30～17:30

 

歐美復古雜誌聖地 Magnif

唔好以為神保町書店街得啲古典文學、詩詞歌賦咁文皺皺嘅刊物，其實呢條街真係臥虎藏龍㗎！Magnif就係萬綠叢中一點紅。佢以亮麗嘅黃色窗架同紅色櫃位搭起門面，蒐集咗大量1950 至 1970 年代嘅絕版潮流雜誌，本本都係耳熟能詳：《VOGUE》、《Harper’s Bazaar》、《ELLE》、《McCall’s Magazine》、《Seventeen》同《anan》等，入到嚟就好似返到去60年代嘅時空一樣。

 

 

詳細資料

景點地址：日本〒101-0051 Tokyo, Chiyoda City, Kanda Jinbocho, 1 Chome-17

聯絡電話：+81 3-5280-5911

開放時間：12:00～18:00

 

網民點講？

@ berlingwong：日本既古書街! 論買書既勝地，台北有誠品，新加坡有紀伊國屋，東京則以神保町古書街為首選。跟前兩者買新書、飲咖啡既大型新書連鎖店不同，神保町古書街只賣舊書，卻別有一番風味。神保町古書街一共有170多間舊書店，不但係日本，亦係全球最大既舊書店集中地。

相信睇日本漫畫長大既香港人應該唔少，唔少人都鐘意擁有屬於自己既漫畫，去日本既古書街，以最相宜既價錢，買最多、最原汁原味、最地道既漫畫，從50円既舊漫畫單行本及小說文庫本至數十萬円既絕版書及江戶時代古籍都應有盡有，經常都想心思思黎呢度尋，想再三回味兒兒時看既漫畫，相信總有驚喜發現!

 

參觀日本天皇住所 城市綠洲皇居

皇居係日本天皇所居住嘅地方，自明治維新後，東京皇居就成為日本天皇嘅居住地，係個有超過400年以上歷史嘅建築。皇居佔地寬廣，廣達230萬平方公尺。適合悠閒嘅旅人花半日嚟呢度散步，飽覽四季宜人嘅繁花盛景。

 

由東京車站出，行大約15分鐘就會到皇居。皇居分為「東御苑」、「皇居外苑」，以及「皇居內」三區，當中「皇居內」係需要事前預約先入得。除咗當日即席報名之外，最好當然係網上預約定，揀返個心水時間入場，咁就萬無一失啦！

 

 

去到皇居，一定要睇護城河上嘅「二重橋」、現存城門中最大規模嘅「櫻田門」、全日本最大嘅天守台「江戶城天守閣跡」，同埋過往為將軍別院嘅日式庭園「二之丸庭園」。呢度嘅日本歷史同文化濃厚，仲有城市森林嘅繁花綠意，實在值得一去。

 

詳細資料

景點地址：1-1 Chiyoda, Chiyoda City, Tokyo 100-8111日本

聯絡電話：+81 3-3213-1111

開放時間：星期二至六09:00～11:15； 13:30～14:45 （星期日及一休息）

 

網民點講？

@Juninho Kwok：東京世一景點, 唔使講, 一定就係皇居。東京作為日本嘅首都, 日皇嘅居住地點, 點會淨係識得飲飲食食呢啲咁普通嘅景點呢 ? 東京最不能夠錯過嘅景點當然就係日皇居住緊嘅皇居喇! 唔好以為日皇仲住喺度就冇得參觀, 其實普通遊客都可以喺網上預約參觀行程㗎! 能夠入到去皇居入面睇到東京最有歷史, 同時又繼續有人住緊, 兼且繼續有佢原來功能嘅歷史建築, 你話呢個景點點樣唔可能係東京世一景點先?

@Leslie Ingles：我心目中嘅東京世一景點係皇居，充滿古典美，可以話係世上最靚嘅皇室建築

 

 

第4位： 一覽關東絕景 晴空塔

除咗東京鐵塔，如果想將東京景色盡收眼底，晴空塔都係唔少人選擇嘅必去景點。有別於東京鐵塔搶眼嘅紅白色，晴空塔採用嘅係藍白色，切合返東京天空樹（Tokyo Skytree）呢個名。晴空塔夠晒高，有足足634公尺！登上天望甲板，可以輕鬆飽覽東京市區同台場海濱區，好彩嘅話仲石機會見到富士山嘅蹤影添～

 

夜幕低垂，晴空塔會由「雅（江戶紫）」、「粋（水藍色）」、「幟（橘色）」三種顏色輪流點綴。星星燈火，晴空塔會成為東京夜景中矚目的風景。

 

網民點講？

@毛晨晨：我心目中嘅「世一東京景點」在世界第一高塔之稱的東京晴空塔俯瞰淺草, 360度無死角的絕美景觀

@Lo Ying：東京晴空塔。企係距離地面350公尺的「天望甲板」，將東京景色盡收眼底~日落時仲有氣氛！同男朋友一齊ENJOY風景，夠晒浪漫。即使唔到晴空塔入面，企係遠少少既地方仲可以望晒成個晴空塔！自拍都可以入晒鏡！夜晚晴空塔仲會發光，好靚，打卡一流！

 

詳細資料

景點地址：1-chōme-1-2 Oshiage, Sumida City, Tokyo 131-0045日本

聯絡電話：+81 570-550-634

開放時間： 10:00～21:00

 

第3位：共度魔幻時光 東京迪士尼

去得東京，梗係要去東京迪士尼玩返夠本先得！分為「東京迪士尼度假區」、「東京迪士尼海洋」兩個園區。喺疫情期間，仲有全新「夢幻樂園New Fantasyland」開幕，有得去美女與野獸園區同玩世界第一個「魔法的故事」嘅咖啡杯～景點咁豐富，畀足一日你都肯定玩唔晒㗎！所以入園之前一定要做足功課，咁先可以用盡每一分每一秒體驗最多嘅設施！幫你準備好2022最強東京迪士尼攻略喇！即刻去睇！

 

 

網民點講？

@Serena Li：東京迪士尼海洋。因為全世界眾多迪士尼當中只係得東京有呢個海洋主題既迪士尼，而且機動遊戲又新穎、唔會同其他迪士尼一樣例如小小世界，其中一個館仲可以令人感覺置身海底世界一樣，呢個奇妙旅程真正是世一東京景點！

@perdujourney：我嘅世一旅遊景點當然係東京迪士尼樂園園區啦!裏面除咗勁大量打卡位，夠曬夢幻同fantasy之外，仲可以同超級多卡通人物影相。裏面又有勁多靚到爆炸嘅商品。最重要係 我喺裏面不論點扮公主都會有人笑我呀! 我又可以扮成胡迪去到佢新開嘅toy story主題酒店做一日胡迪嘅滋味添!試問呢個世界上面有邊個地方可以畀我做到呢啲嘢呢?當然淨係得東京迪士尼樂園先可以啦!

 

詳細資料

景點地址：1-1 Maihama, Urayasu, Chiba 279-0031日本

聯絡電話：+81 45-330-5211

開放時間： 08:00～22:00

 

第2位：遠眺繁榮市景最佳點 東京鐵塔

唔使我多講，象徵住戰後東京復興嘅紅白色東京鐵塔，當然係好多人心目中嘅世一景點啦！咁你又知唔知，原來當時東京鐵塔起好之後，係超越咗巴黎鐵塔，成為世界第一高？正正因為佢咁高，所以企喺展望台，就可以俯瞰成個東京嘅熱鬧市街，周邊景色一覽無遺。喺東京鐵塔遠眺日夜兩景，驚艷程度都平分秋色、各有精彩㗎！

 

 

最得意嘅係，東京鐵塔入面竟然都有神社，係東京23區內最高嘅神社──鐵塔大神宮！聽講嚟呢度祈求戀愛運同考運都相當靈，唔知係咪因為特別高，所以神明都容易啲聽到你嘅願望呢？

 

網民點講？

@Wai Hei Ng：我認為世一東京景點就係東京鐵塔我細細個就聽過呢個名! 當日夜晚8-9pm去到, 見東京芝公園唔多人~但佢會夜晚著燈, 係東京市中心閃閃發光!佢外形似巴黎艾菲爾鐵塔, 但係佢嘅燈光顏色係會隨住唔同季節節日而轉主題顏色, 實在非常有諗頭! 係無遮無掩環境下幫東京鐵塔影到最美一面實在好正! 有得夜晚近距離欣賞到佢, 真係死而無憾~

 

@tototim1231：我心目中嘅「世一東京景點」一定係東京鐵塔！ 因為佢一講起東京，腦海中第一個畫面就係浮現東京鐵塔，係電話打「東京」兩個字都會跟住出「鐵塔」兩個字同埋佢嘅專屬Emoji！東京鐵塔無論日夜都係咁靚咁浪漫，日頭紅白鐵塔有藍天白雲嘅襯托更顯佢嘅宏偉，尤其夜晚會著燈令人有種好似置身係亞洲版巴黎鐵塔嘅感覺，好浪漫！同埋好多好靚又著名建築物好似六本目/木，Shibuya sky等等都好似為左望到東京鐵塔不同時份嘅美景嚟起咁，絕對可以話係東京嘅中心點！已經好多年冇去過旅行，依加就算日本開翻關都好，機票都仲未買得落手，從未去過東京，如果自由鳥可以送我雙人來回香港東京機票同男朋友一齊去睇我心目中嘅世一東京景點—東京鐵塔就好啦！！️

 

詳細資料

景點地址：4-chōme-2-8 Shibakōen, Minato City, Tokyo 105-0011日本

聯絡電話：+81 3-3433-5111

開放時間： 09:00～22:30

 

第1位：過千網民推薦冠軍 富士山

最多網民推薦嘅景點就係富士山喇！富士山大約喺 10 萬年前就形成㗎喇～每年都有好多世界各地嘅旅人及登山者，千里迢迢到靜岡縣同山梨縣，一睹呢座靈山嘅全貌。想憑愛意要富士山私有就唔得喇，但係要360度無死角咁欣賞富士山，去河口湖就好大機會可以睇清佢真嘅面目！

 

 

河口湖位於日本嘅山梨縣，係日本富士五湖之一，亦係位置最北同最低海拔嘅湖泊，而佢嘅知名度同時係最高。 嚟河口湖可以一覽富士山嘅絢麗風光，如果天氣好，仲可以欣賞到富士山喺湖上面嘅倒影，無論春夏秋冬都有唔同景觀，值得你一睇再睇！

 

 

網民點講？

@ Nat Nat Love：世一東京景點 非絕美嘅鑽石富士山莫屬！由飛機上俯瞰已充滿神秘感！富士山腳下仲有好多唔同嘅景色映襯，無論任何時間同季節 都可以瘋狂抹煞手機記憶體~ 春：鬱金香、櫻花；夏：百日草、向日葵；秋：紅葉；冬：燈展、雪花；️真係靚到窒息！最重要係打卡時必定唔少得嘅自由鳥 遨游SIM，簡直如虎添翼！一SIM在手世界通行“鳥”並唔係浪得虛名！load得快，好世界！開live唔窒機！去旅行想自由行，自由鳥係不二之選！清晨時間喺河口湖邊，仲可以睇到日出！太陽伯伯剛好掛喺山頂上高~值得一訪嘅夢幻仙境：忍野八海！嗰度有清澈見底嘅泉水，同富士山拍埋一齊可以組合成一年四季唔同嘅畫卷！

@ Sau Sau：心中的東京世一景點，是每年6月期間限定的畫面 – 在河口湖大石公園的 薰衣草田眺望世界遺產富士山與河口湖的美景，實在是無與倫比的美麗。一片紫色花海由數之不盡的薰衣草組成，淡淡幽香瀰漫空氣。一呼一吸，令人如置身最清新、最原始的精油旅行中。 加上微風輕吹拂過，在視、嗅、觸覺上，這片浪漫的紫色花海已經醉倒人心。 但更動人之處，在於這畫面有雄偉的富士山在遠處襯托，成為最強的背景布幕，以藍白色的高山配上眼前的紫色花海，一遠一近，不同的色調構成和悅的美景，一剎那間，在這地方恍惚將所有具代表性的日式美景與浪漫都已盡收眼底，成為心中世一

@PW Chan：我心中嘅「世一東京景點」係富士山！因為富士山係日本最具代表性嘅象徵，未看過富士山等於未去過日本！一年四季有著不同美景，櫻花/楓葉/雪景，各有特色，而且要一睹富士山嘅壯麗景致真係好講緣份，可遇不可求，睇到最珍貴嘅「赤富士」、「鑽石富士」、「珍珠富士」更是一見難忘！加上想要攀登富士山絕對不是易事，如果我有幸能上到富士之最高峰，真係人生不枉此行！

 

詳細資料

河口湖地址：日本山梨縣南都留郡富士河口湖町

 

睇完唔多喉？撳呢度睇更多2022東京必去景點！有埋開關必去6個新景點分享！

 

部分相片來源來自網絡。