#自由鳥漫遊世界

去得東京玩，梗係要留一日去東京迪士尼兜過幾個圈同看木馬旋轉啦！我已經幫你整合好晒2022年最強、最全面嘅東京迪士尼樂園攻略，包括事先準備、快證Fast Pass、買飛教學、迪士尼交通同必玩設施推薦～事不宜遲，即刻睇落去！

2022最強東京迪士尼攻略｜事先準備

 

 

1．擇入園吉日？Check咗東京迪士尼官網人次預測先

去迪士尼做足準備！如果想玩得盡興，就一定要好好規劃。買飛之前，強烈建議你睇咗官網嘅入園人數預測先擇吉日去玩。唔使我講你都知，每逢假日同節日，去迪士尼玩嘅人數肯定特別多。利用呢個網頁，你可以睇到唔同日子嘅預計入園人數同天氣。叻叻豬就會揀綠色、藍色同白色呢啲比較少人嘅日子入園，避開假日、連假同節日正日，咁到時就唔會咁逼同排咁耐隊啦！

 

 

2．遊園必備排隊App：Tokyo Disney Resort App

無論你係去「東京迪士尼度假區」定係「東京迪士尼海洋園區」，喺出發之前，請一定要下載定迪士尼官方 App——Tokyo Disney Resort App。目前呢個官方app只有英文同日文界面（如果你想透過app買飛，就只可以用日文界面）。你可以經app即時睇到每個樂園設施嘅排隊時間，方便你安排遊玩唔同設拖嘅次序。

 

 

 

除此之外，你仲可以用Tokyo Disney Resort App 預約定時間去指定餐飲設施，以及睇成個園區嘅地圖等等，令你更加容易慳住時間玩盡迪士尼！

 

而最重要嘅係，迪士尼官方 App有預約等候卡Standby Pass嘅功能（詳情請留意下文），scan返你張飛嘅QR code，就可以抽籤去拎特定設施嘅排隊資格。喺人流如鯽嘅時候，迪士尼有機會淨係開放設施俾抽到Standby Pass嘅人排隊玩（注：由2022年10月起，只有幽靈公館有呢個服務，未來迪士尼可能會視乎情況更新措拖）。所以下載定Tokyo Disney Resort App係有百利而無一害～

 

 

幫緊你、幫緊你！下載連結喺度：

Android 版撳呢度

iPhone版撳呢度

 

 

其他旅行攻略

【2023東京必去景點】10大東京食買玩自由行好去處｜加碼盤點開關必去6個新景點（持續更新）

2023網民專業推介【世一京阪神景點】

【2023曼谷必遊IG-able景點合集】：隱世湖畔森林打卡cafe｜人氣市集最新資訊｜奢華極嘆SPA推薦

 

 

2022最強東京迪士尼攻略｜迪士尼快證 Fast Pass

上文就解釋咗點解下載迪士尼官方 App咁重要，而大家最關注嘅迪士尼快證，其實都同個app息息相關㗎！現時東京迪士尼已經取消咗以往嘅Fast Pass，改成（1）迪士尼尊享卡Disney Premier Access、（2）預約等候卡Standby Pass同（3）報名體驗Entry Request。咁點先可以買到呢？無錯呀，陳生又係你喇！就係用 Tokyo Disney Resort App買。目前上述3者都只能夠透過個app購買或抽返嚟，所以如果冇佢，你話幾咁唔方便呢？

 

（1）迪士尼尊享卡（DPA）

簡單而言，迪士尼尊享卡Disney Premier Access就係收費版嘅Fast Pass，每位2,000日圓，大人細路都同價。買咗Disney Premier Access，你就可以指定希望入場嘅時段，仲可以較短嘅等候時間入場，享受用金錢堆砌出嘅特權快感。有興趣？你可以用Tokyo Disney Resort App（英文版）買呢個pass；又或者去東京迪士尼樂園的「Main Street House」或在東京迪士尼海洋到「Guest Relations」即場課金。

 

 

敬請留意：你只能喺指定時間入面用一次Disney Premier Access去玩一項設施，如果你食過返尋味，想再次以Disney Premier Access進入遊樂設施，就要再買過。

 

（2）預約等候卡Standby Pass

正所謂豐儉由人，唔課金都可以享受到舒適嘅樂園體驗。透過迪士尼官方App攞免費嘅Standby Pass，就可以依照指定時段到現場排隊。有部分園區體驗係要遊客出示Standby Pass先可以進入，而發行Standby Pass嘅設施會喺於特定時段，只開放畀有呢個pass嘅遊客入場體驗。一個唔好彩，當遊園人數太多，有可能只有抽到Standby Pass嘅人先有能排隊。除咗遊樂設施之外，有舖頭同餐廳都會視情況發行Standby Pass。唔想輸在起跑線？咁就記得用app攞定Standby Pass！

 

 

（3）報名體驗Entry Request

實在太多遊客會去迪士尼玩喇！所以基本上樂園入面表演類嘅體驗，全部都需要事先預約。喺迪士尼官方App使用Entry Request服務，可以隨時報名體驗活動。不過要留意，你每日只可以報名體驗 1 次各個設施或者表演，而且次數唔會因報名結果而變更。

 

 

 

其他旅行攻略

【2023東京必去景點】10大東京食買玩自由行好去處｜加碼盤點開關必去6個新景點（持續更新）

2023網民專業推介【世一京阪神景點】

【2023曼谷必遊IG-able景點合集】：隱世湖畔森林打卡cafe｜人氣市集最新資訊｜奢華極嘆SPA推薦

 

 

2022最強東京迪士尼攻略｜買飛教學

 

 

諗好咗邊日去迪士尼玩？咁就一於去買飛啦！ 東京迪士尼樂園門票有3種，分別係：

(1) 一日護照：可指定入園日期同選擇園區，由自開園起暢遊園區 1日

(2) 一日護照（身心障礙者專用）：持有身心障礙證明嘅遊客同1 位陪伴者使用，由自開園起暢遊所選擇嘅園區 1日

(3)午後護照：可以喺星期六／星期日／日本國定假日嘅 15：00 起入園選擇 1 座園區入去

門票種類	全票 （> 18歲）	學生票（12～17歲）	兒童票（4～11歲）
一日護照	7,900 ～9,400日圓	6,600 ～7,800日圓	4,700 ～5,600日圓
一日護照 （身心障礙者專用）	6,500 ～7,400日圓	5,300 ～6,200日圓	3,800 ～4,400日圓
午後護照	4,500 ～5,400日圓	4,500 ～5,400日圓	4,500 ～5,400日圓

東京迪士尼樂園門票嘅價格會因應唔同日子有變動，以一日護照嘅全票為例，平日一般都係8,900日圓，但係到咗周末同聖誕新年假期前後，票價就會係9,400日圓。想錫住荷包仔嘅話，可以揀平日先去～

 

點買飛？

目前東京迪士尼樂園只供網上買飛，你可以去官網買。你亦可以到klook同kkday 買飛，雖然目前呢兩個網站只有一日護照揀，票價亦同迪士尼官網同價，但經佢地買可以省卻迪士尼官網嘅輪候時間。

 

 

2022最強東京迪士尼攻略｜迪士尼交通

講咗咁多，終於可以入東京迪士尼喇！你可以揀搭電車或者巴士前往。無論你搭咩車，或者喺邊個站出發，都係搭到JR舞濱站係最近。

 

 

到咗JR舞濱站，跟住可以轉迪士尼園區單軌電車，前往你想去嘅目的地。一出JR舞濱站，你就會見到輕軌度假區總站，搭一個站就係迪士尼樂園站、第二站是海濱站(酒店區)、第三站是迪士尼海洋。

 

 

 

2022最強東京迪士尼攻略｜必玩設施推薦

入東京迪士尼樂園玩，你可以揀去「東京迪士尼度假區」或者係「東京迪士尼海洋園區」。太多嘢玩，唔知邊啲係唔可以錯過嘅設施？我幫你揀好喇！

(1) 東京迪士尼度假區

• 美女與野獸園區

美女與野獸園區係東京迪士尼樂園嘅全新園區，入面有以漸層糖果色堆疊嘅夢幻尖塔城堡，高達30公尺，完美還原返《美女與野獸》每個場景。企喺城堡面前，感覺貝兒「賣爸爸」嘅一幕就係眼前重演。

 

 

城堡入面已經準備好魔法茶杯俾你坐，隨住電影經典配樂嘅旋律轉濌，你會記起每一個奇妙嘅精彩時刻。這款遊戲設施係東京迪士尼獨有㗎，記得入去體驗喇！

 

 

• BayMax Happy Ride

BayMax Happy Ride係明日世界嘅全新遊樂設施，機器人醫神會喺你搭嘅車仔前面牽引，配合埋活力四射嘅動感音樂，坐上去high住氹氹轉，體驗刺激嘅快樂旅程。

 

 

• 幽靈公館

幽靈公館係期間限定嘅室內經典黑暗遊樂設施。除咗東京迪士尼，喺加州迪士尼、佛羅里達州神奇王國同巴黎迪士尼都有㗎！而香港迪士尼樂園嘅迷離大宅都係參考呢個設施而設計。於 2022年9月14日～2023 年1月4日期間，你夠薑就去陰森詭秘嘅幽靈公館睇吓入面搞邊科！呢棟哥德式大宅有999隻幽靈等住你加入，成為佢哋嘅一份子。種種光怪陸離嘅奇怪事件即將發生，你準備好未？

 

(2) 東京迪士尼海洋園區

• 反斗奇兵瘋狂遊戲屋

離遠你就會見到口擘擘嘅胡迪，呢個就係迪士尼海洋園區嘅超人氣4D電影設施——反斗奇兵瘋狂遊戲屋！嚟呢度，你會掉返轉縮小成玩具尺寸，用佢哋嘅眼睛看世界～戴返副3D眼鏡坐車仔，即刻同你嘅朋友仔展開激烈嘅射擊旅程！

 

 

• 驚魂古塔

去完反斗奇兵參加大賽射擊之後，眨吓眼你就嚟到隔離嘅驚魂古塔。驚魂古塔係同故事情境結合嘅室內自由落體。1899 年，有個鍾意收集世界各地古董嘅收藏家，因為堅持收藏一件受詛咒嘅寶物，令佢喺一棟豪華酒店入面搭電梯時，同寶物一齊離奇失蹤。你係返到1912年嘅時光旅人，參加紐約市保存協會舉辦嘅參觀行程，重溫酒店昔日嘅風華。但係去到搭電梯嘅時候，你要有心理準備經歷令人毛骨悚然嘅神祕現象……

 

 

同場加映：必到東京迪士尼海洋園區搶購限定Duffy and Friends商品！

你知唔知道，原來每個迪士尼樂園都會推出唔同嘅 Duffy & Friends 商品，而大部份商品都係期間限定？嚟到東京迪士尼樂園，點可以錯過近期大熱嘅呢套冬日限定系列？全世界只有東京迪士尼可以買到㗎咋！記得帶佢哋返屋企喇～

 

 

部分相片來源來自網絡。