2022網民專業推介【世一京阪神景點】
本鳥一直都有細心聆聽網民嘅意見，更加相信你地嘅意見係專業嘅！今次本鳥精心整理咗大家心目中嘅【世一京阪神景點】，同大家一齊開心Share！
京都 – 日本千年古都
伏見稻荷神社 – 京都人氣之最
伏見稻荷神社最出名就係入面嘅「千本鳥居」，記得本鳥第一次去見到成百上千排嘅紅色鳥居，的確為之震撼，亦係打卡首選！電影《藝妓回憶錄》亦曾於此取景拍攝。
大家仲可以係神社入面購買鳥居御守，向掌管生意興隆、家庭幸福等稻荷大神祈福許願。
一排排寫滿祈福心願鳥居御守
狐狸與稻荷大社的關係？
稻荷神社另一個亮點就係「狐狸」，不同於一般神社拜殿或鳥居兩旁嘅「狛犬」，伏見稻荷大社兩旁佇立的是「狛狐」。原因係農業社會裡，狐狸會替農家抓捕破壞農作物的野兔、田鼠等，因此狐狸被視為稻荷神的神使，守護著大家嘅農業。
狐狸鑄像嘴裡刁著稻穗（象徵豐收），其他穀物、書卷（象徵智慧）
同朋友係神社商店區買狐狸面具，著和服影相打卡
隨便影都好IGable
網民點講？
@Wan Kit Ling︰一百個人心中有一百個「世一」，對於我而言「世一京阪神景點」一定是位於京都的【伏見稻荷大社】。每次走進【伏見稻荷大社】看見那千百年歷史的宏偉神社建築，歷史長河的氣魄總是震懾人心；稻荷大社內處處可見的狐狸鑄像以及建築屋樑上的狐狸使者雕刻更是惟妙惟肖，仿若神明使者就在身旁；過萬數量延綿不絕的「千本鳥居」更是彰顯稻荷大社的歷史悠久、信仰不絕，實在令人不由讚歎。【伏見稻荷大社】的「世一」在於它的歷史痕跡，經歷過紛紛不斷的戰亂天災，建築的宏偉依舊保持魅力，成就了千萬人的信仰寄託。
世界文化遺產「清水寺」
清水寺始建於西元778年，曾受火災損毀，1633年由德川家族重新修繕成現今模貌。1994年被列為世界文化遺產，自2017年春天起整修屋頂與正殿，於2020年12月完工。可惜受疫情影響，大家一直未有機會去。但隨著日本開關，大家終於可以親身見證，一睹其最新面貌。
「清水寺」必看場景「清水舞台」 – 以139根柱子支撐，據說從頭到尾未用一根釘子聞名於世。而且一年四季皆有不同面貌。
春天去「清水寺」可以賞櫻
充滿夏日氣息「清水舞台」
夜色秋楓「清水舞台」又有另一番風味
夢幻雪景「清水舞台」
網民點講？
@Cheung.Zoi︰我心目中嘅世一京阪神景點係清水寺，榮獲世界文化遺產美譽，旅遊觀光寺廟感受它重修後不同（2017前及2020年後），洗滌心靈，居高欣賞紅葉景致，世一景點也。
@Penny.Tan︰世一係清水寺，無論是春櫻、夏瀑、秋楓、冬雪都有其獨特的美
嵐山 – 日系山水自然風光
想感受日本嘅郊外景色，賞櫻、賞楓、賞竹林，你一定要去京都著名景點「嵐山」。最佳遊覽「嵐山」嘅方法，當然就係乘坐嵐山小火車，沿途可欣賞保津川溪谷美景，櫻花季或楓葉季景色各有不同。
小火車第一站就係「嵐山站」，落車後步行數分鐘就到達嵐山最出名嘅「竹林之道」。
高聳的竹林樹立兩旁，給人一種禪意，身處其中彷彿心情也平靜下來。
另一個必到景點「渡月橋」，名偵探柯南劇場版《唐紅的戀歌》取景地之一，動漫迷萬勿錯過！
「渡月橋」上可以欣賞成個嵐山的風景
另一個受歡迎景點「野宮神社」正門口嘅黑色鳥居，據說保留左日本鳥居最古老嘅模樣，亦係全日本少數嘅黑色鳥居！
「野宮神社」出名祈求姻緣和學業，係嵐山裡香火最鼎盛嘅神社之一
網民點講？
@Tina.Chu︰我心目中嘅「世一京阪神景點」係嵐山。不但只在不同的季節有竹林、楓葉和櫻花觀賞，更能在cafe坐下享用咖啡及日式甜點享受靜謐時光，短暫逃離這個紛亂的世界。
@李榮︰京都嵐山又靚又舒服， 風景優美，令人流連忘返，天龍寺及竹林值得一去，仲可以坐 嵐山小火車。傳統嘅日式建築都維護得好好，同大自然十分配合 。保津川船欣賞兩岸青翠樹木，秋天楓葉，令我諗起周杰倫嗰首楓。坐渡月橋兩岸可欣賞美麗日落黃昏景色，令人陶醉。
@Mavis.Wong︰古時為貴族旅遊地嘅嵐山，得到政府特意保留當地環境而限制建設工程，得以保留原始風貌。去嵐山旅遊唔止可以欣賞風光如畫嘅美景，徜徉渡月橋，漫步竹林，品嚐當地豆腐料理，更可以了解古時貴族生活，了解當地歷史文化，嚟一趟時空之旅。 預算足預仲可以搭船住新建嘅星野度假村，遠離塵囂，做一日現代貴族
大阪 – 集美食、購物、娛樂及文化的魅力之都
棒球聖地「阪神甲子園球場 」
棒球聖地的「阪神甲子園球場」，亦即係大家熟悉嘅「甲子園球場」，位於大阪同神戶間嘅西宮市，超過90年以上歷史。除左係舉行職棒嘅場地，呢度亦係所有日本高中棒球員憧憬嘅舞台，係佢地揮灑汗水、燃燒青春同追逐夢想嘅聖地！透過觸摸甲子園嘅泥土，接觸同感受獨一無二嘅歷史同激情。
總佔地面積39,600平方公尺，可容納50,454人
第104屆日本全國高中棒球錦標賽（俗稱夏季甲子園）仙台育英高中贏得冠軍。
仲有無人記得安達充《棒球英豪》？一齊去甲子園朝聖啦！
日本環球影城Universal Studios Japan – 世一娛樂主題樂園
相信環球影城無需要本鳥晒口水推介，所以集中講下疫情期間同黎緊2023年多左啲咩野玩，俾大家參考下。
超級任天堂世界™園區
2021年盛大開幕嘅超級任天堂世界™園區，真係令本鳥興奮到不行鳥，所有童年回憶返晒黎！園區裡面有瑪利歐蘑菇王國、庫巴城、碧姬城等，仲可以同瑪利歐、耀西影相打卡，玩刺激機動遊戲，就好似置身係遊戲世界一樣。
「瑪利歐賽車 庫巴挑戰書」係透過VR技術嘅雲霄飛車，玩家除左要一邊躲避庫巴嘅攻擊，仲要一邊撿拾途中會出現嘅道具，真係十足十玩緊現實版MARIO賽車。本鳥心情真係好滾動！
MARIO賽車大家係屋企就玩得多，但真係坐上去MARIO賽車，大家又試過未呢？
日本環球影城2023與《SPY×FAMILY 間諜家家酒》首度合作！
日本動漫作品《SPY×FAMILY間諜家家酒》是近期大熱嘅話題作。精靈可愛嘅主角安妮亞更係大批粉絲Cosplay嘅對象。今次係環球影城嘅遊戲，玩家會化身成主角之一的黃昏後輩，成為一名新手特工，協助黃昏完成任務，玩家需通過唔同線索破解密碼！完成任務後，玩家仲可以同安妮亞影相留念。
同《SPY×FAMILY間諜家家酒》角色打卡玩遊戲
日本環球影城2023年將會聯同日本4大人氣作品，分別推出全新遊戲設施及餐廳等
網民點講？
@Nicole.La︰世一京阪神景點一定係日本環球影城🏰 點解？因為環球影城有唔同經典嘅電影遊樂設施，例如哈利波特嘅禁忌之旅同侏羅紀嘅侏羅紀公園乘船遊，俾電影迷可以置身係電影場景當中！同時亦有minion、芝麻街同snoopy等等適合小朋友嘅園區。仲會不定時增設熱門日本動漫嘅限定活動！真係啱曬一家大細入去感受氣氛，盡情玩樂。而且日本環球影城裡面嘅工作人員永遠都會帶住燦爛嘅笑容同真切嘅服務態度去對待每一位客人。最記得當時係攤位遊戲屢敗屢戰，終於贏到一個Elmo公仔時，靚女職員姐姐表現得比我地更興奮，深深感受到佢地嘅熱情！再者，裡面嘅美食琳瑯滿目，無論係外表同味道都無可挑剔，保留日本美食精粹亦展現到唔同園區嘅特色。最重要係，我同屋企人、朋友都係日本環球影城留低左珍貴美好嘅回憶！所以日本環球影城真係一個令人百去不厭，樂而忘返嘅世一京阪神景點！
@Florence.Shum︰世一京阪神景點是環球影城。因為有超愛的“哈利波特”，勁有帶入感，那些會郁的畫太逼真了，電影場景一幕一幕浮現在眼前，搭配4D效果，上了車後就可跟哈利波特一起玩了！“飛天翼龍”🐉讓人全程尖叫，非常解壓，因為懸掛式的過山車🎢，各種翻滾、倒掛、旋轉跳躍…..最好睜著眼👁玩完！“侏羅紀公園”🦖🦕其實即是激流勇進，夏天玩勁爽！不過水花💦會淋濕全身！“蜘蛛俠”🕷，類似哈利波特那種4D，雖代入感沒哈利波特強，不過也好好玩，皆因可以跟著Peter一起飛躍在高樓大廈裡。“小黃人”太可愛了，亦是4D效果那種…..還有很多，還有許多，世一京阪神景點不遑多讓！
心齋橋 – 大阪購物天堂
「心齋橋商店街」可以話係港人最愛血拼嘅地方。全長約600公尺。包含連接前後的其他商店街的話，成為一條約數公里延綿不斷的商店街。集藥妝店、免稅店、百圓店、動漫人物店、餐廳同咖啡店等，你想買嘅嘢都應有盡有！
必掃藥妝店「松本清」
日本超人氣連鎖藥妝專門店「Matsumoto Kiyoshi松本清」在心齋橋筋商店街內都進駐左好幾間的分店。松本清所創立的自有品牌「matsukiyo」，勝在CP值高，廣受好評，加上有免稅優惠，部分店員亦會講中文，非常適合港人掃貨。
松本清心齋橋店
地址 〒542-0085 大阪府大阪市中央区心斎橋筋2-1-21
營業時間：10:00〜22:30
公休日：全年無休
必食零食店 – 万菓堂
万菓堂售賣各式各樣在地伴手禮，最出名嘅係「みたらし小餅」QQ軟滑、濃濃米香，配上醬油餡十分特別。「本千鳥饅頭」亦偽招牌貨，白豆沙以北海道手亡豆製成、入口即溶 。
万菓堂
地址：大阪市中央區心齋橋筋2丁目3-19 (地圖)
營業時間：11:00–20:00 (周一至周日)
必買時裝 – UNIQLO心齋橋店
「UNIQLO心齋橋店」係日本「國際旗艦店」，有好多日本獨家限定嘅精品！由B1F到4F的寬敞嘅空間，大家可以盡情享受快樂嘅購物時光。
UNIQLO心齋橋店 ユニクロ心斎橋店
地址 〒542-0085 大阪府大阪市中央区心斎橋筋1-2-17
營業時間：11:00〜21:00 公休日：全年無休
網民點講？
@ctlittlesharing︰大阪心齋橋，雖然好似平平無奇但個個去大阪都一定會去😎而我簡心齋橋係因為自己超級鍾意shopping，一條（超長的）街有齊藥妝店、uniqlo、gu、daiso等人氣商店，又有好多食店行到攰可以坐低食完再戰鬥，結果上次去行咗兩日😂（辛苦晒男朋友）所以呢個絕對係我心目中嘅世一京阪神景點‼️ @crystsangl @siuchungchan
神戶 – 日本上等牛肉「神戶牛」
黎到神戶當然要試下聞名全世界嘅「神戶牛」。號稱日本三大和牛的神戶牛、松阪牛、米澤牛，其中通過最嚴審查基準的是神戶牛。要成為「神戶牛」並唔容易，佢必須係和牛品種「但馬牛」且需通過「神戸肉流通推進協議会」所規定嘅嚴格條件先可以被稱為「神戶牛」。
一句講晒，唔食就走寶啦！
網民點講？
@Jayden.Tsang︰京阪神世一當然係神戶。其一原因就當然係我偶像籃球明星Kobe Bryant其名字既發想地，Kobe Bryant的爸爸Joe Bryant也是名NBA籃球好手，在Kobe出生之前，Joseph Washington Bryant與妻子非常喜愛一間餐廳的招牌菜，那道菜餚的名稱正是「神戶牛排」Kobe Beef，Joseph希望自己的兒子能像這道菜餚一樣，在鑽研的領域中成為箇中翹楚，因此將兒子以傑出的神戶牛Kobe命名。真係好想可以親身同寫有[KOBE]地名既地標拍照留念。其二就當然係想去當地食下最出名既神戶牛最後，神戶港既夜景，有馬既溫泉，歷史既匯聚姬路城等既景色都由我中學時代開始深深吸引著我，希望有機會親身體驗一次
奈良
奈良公園 – 人與鹿和平共處
京阪神最後當然唔少得奈良公園啦！雖然好多人都話奈良好多進擊的小鹿，但本鳥就覺得啲鹿仔好打意，俾佢地圍住仲有種上左天堂嘅感覺 (我要飛啦)！其實如果你鐘意小動物同大自然，本鳥極力推介你嚟奈良公園同鹿仔玩架。
櫻花樹下嘅奈良鹿鹿
俾可愛鹿鹿圍真係好幸福
若草山 – 多啦A夢同大雄嘅學校後山景
去到奈良公園，如果大家想遠離喧鬧人囂，咁「若草山」就係一個好選擇。「若草山」就係奈良公園旁，徒步40分鐘左右就可以上到去觀景台，沿途仲可以見到結集成群嘅小鹿係山坡食草、訓覺、過得休閒寫意。本鳥第一次上到「若草山」，第一個既視感就係多啦A夢同大雄成日去嘅後山，一望無際嘅藍天白雲同日式住宅，突然有一種興奮莫名嘅感覺！
有種心曠神怡嘅感覺
睇相係咪都有少少似呢? 去到睇個view仲正呀！
網民點講？
@Jayden.Tsang︰一定係京都奈良睇鹿仔，再去浸埋溫泉！奈良啲鹿仔完全唔驚人，可以好近咁去喂佢地，佢地真係勁可愛！周街都總有一隻喺左近。附近仲可以浸埋溫泉，冬天凍冰冰浸溫泉一流
部分相片來源來自網絡。